يابـوي جعلـك للبقـا والمكاسـيـب
عمري بدونك يالذرا ويش أبـي بـه
يابوي تسأل عـن شفـاك المراقيـب
طلعـة سواتـك للنّوايـف غريـبـه
ليه المرض مايعرف الزّين والعيـب ؟
مايـدري انـك للمخاليـق هيبـه !!
أبسألك وش به غزا وجهـك الشيـب
والقلـب لايـع والنواظـر شحيـبـه
وش بك تحاتي لانوى الموت تغريـب
تخشـى علينـا بالليّـالـي الكئيـبـه
خذ دلّتك وارتكى على مسنـد الجيـب
وعطني شماغك بلثمه وأحتمـي بـه
ونروّح لأرض ٍ بها العشـب والطيـب
وتسمـع كـلام ٍ يالغـلا تحتفـي بـه
يابـوي بنتـك لاانحكـى بالتّجاريـب
كـل ٍ يشـق لهيبـه الصّيـت جيبـه
يابوي ماني مـن سـوات المخاريـب
اللّـي تجيـب لعليَـة القـوم خيـبـه
وماني من اللّي لامشت حفّها الرّيـب
أنـا مـن اللّـي مايدنّـس حليـبـه
مرفوع شاني عـن غـرام المكاتيـب
وأكبر من انّنـي أرتضـي بالحبيبـه
أنـا غرامـي لاابتتـدوا بالتّراحيتـب
نفوس الأوادم فـي وجـودي رحيبـه
وان كان زينـي فتنـة ٍ للمصاويـب
أحـط وجهـي بالحريـق ولهيـبـه
زيني أبيعه وأشتري سمعـه الطّيـب
اسم ٍ ينومس بالصّـروح الـذ ّهيبـه
وان كان عندي ( بالحلا) شي ٍ اصعيب
عنـدي جـدود ٍ مارضـت بالغليبـه
دموع القبايل في لقانتا مساااااااااكيـب
كـن المقابـر لاحضرنـتـا قريـبـه
خضّبت لك كفّي مـن العـز تخضيـب
ورفعت راااااااااااسي للنّجوم الصّعيبـه
والله لأسـدّك بالفعـول المصالـيـب
والله لأشيلـك بالرخـا والمصيـبـه
طلـع المعالـي ماانحكـم للشّواريـب
بنت ٍ وأناطـح فـارس القـوم طيبـه
وياشيخي إبشـر لوتـدور الدّواليـب
بنتك إلا منّه عـوى الذّيـب ( ذيبـه)



قصيده اعجبتني واتمنى تعجبكم ,,